Formulaire de recherche

Wel 3

Awobe ka Aron

1I kare kame Rwot oyamo kede Musa i moru me Sinai, magi en oudo idwe ka Aaron kede Musa. 2- Aaron oudo tie kede awobe ongwon: Nadab awobi kao, Abiku, Eleasar, kede Itamar. 3En bin ewiro gi pi bedo josaseredoti. 4- Do Rwot bin oko neko Abiku kede Nadab kakame gin bin kitio kede mac kalikame oudo kociko negi me mino giayala i wi tim me Sinai. Gin oudo likame kitie kede idwe, omio Eleasar kede Itamar kenekene en oko tic bala josaseredoti i kare me kuo ka Aaron.

Koyero Jolebi pi Tic ne Josaseredoti

5Rwot oko waco ne Musa be, 6“Kel jo me ekeko ka Lebi kan, di iko cibo gi bedo jotic kame bino donyo konyo ngasaseredoti Aaron. 7Gin kibino donyo timo nen kede ne jo dedede tic i Eema me ariamakin keda. 8Jame dedede kame tie i Eema nono bino bedo i cing gin, doko da kibino donyo timo ne jo dedede me Isirael tic. 9Tic kame komio gin Jolebi en konyo Aaron kede ikwae mege. 10Do in ibino cibo Aaron kede awobe mege bedo josaseredoti; ngat apat kame bino tamo timo tic nono kobino neke.”

11Di Rwot oko bobo waco ne Musa be, 12-13- “I kare kame bin ango aneko kede idwe kao dedede i lobo me Misiri, ango bin ako kwero idwe kao dedede me jo kede me leini i Isirael pi bedo mega amaka. Ango nan agamo Jolebi kikom jo me Isirael pi bedo aluny me idwe kao dedede kame kobedo mino buta i Isirael. Gin kibino bedo mega amaka. Ango en Rwot.”

Maro Wel me Jolebi

14Rwot oko ciko Musa i wi tim me Sinai 15pi wandiko Jolebi dedede di lubere kede ude ka joakwari gi kede miere gi, cako kibut atin awobi me duwe acel ot malo. 16Musa oko wandiko nying gi bala kame Rwot oudo ociko ne. 17Awobe ka Lebi gin ige: Gereson, Kokat kede Merari. 18Awobe ka Gereson gin ige: Libini kede Simei. 19Awobe ka Kokat gin ige: Amuram, Isikar, Keburon, kede Usiel. 20Awobe ka Merari gin ige: Makali kede Musi. Magonogi en ikekon me Jolebi di lubere kede joakwari gi.

21Ekeko ka Gereson oudo tie iye jo me ot ka Libini kede jo me ot ka Simei. 22Cuo dedede kame oko wandiko i diere gin cako ki atin awobi me duwe acel oko bedo tutumia kanyaare kede tol kany (7,500). 23Jo ka Gereson nogi oudo poore gero kimere gi i bad tetu tim cen ngei Eema, 24di Eliasap wot ka Lael en kame tie ngatel gi. 25Jo ka Gereson nogi tic gin i Eema me ariamakin kede Rwot oudo obedo gwoko aum me eema i yie kede aum mere me ooko, egoe agalao ekeko me donyo iye, 26isukan agalao diakal mere karacel kede egoe agalao kadonyo i diakal mere kede aunoi mege. Tice dedede amakere kede gi nogi oudo tie i cing gin.

27Ekeko ka Kokat oudo tie iye jo me ot ka Amuram, Isikar, Keburon kede jo me ot ka Usiel. 28Cuo dedede kame oko wandiko i diere gin cako ki atin awobi me duwe acel oko bedo tutumia kanyauni kede tol kanyape (8,600). 29Jo ka Kokat nogi oudo poore gero kimere gi i bad tetu piny me Eema, 30di Elisapan wot ka Usiel en kame tie ngatel gi. 31Jo ka Kokat nogi tic gin oudo obedo gwoko Sanduku me Isikan, emesa, gicibo etala, alutarin, jamini kame josaseredoti tio kede i Kabedo Kacil, kede esuka kame galao kadonyo i Kabedo Kacil Kalamo. Tice dedede amakere kede gi nogi oudo tie i cing gin. 32Eleasar wot ka Aaron ngasaseredoti oudo obedo ngadwong me jotel me Jolebi. En oudo tic mere neno jo kame timo tic i Kabedo Kacil.

33Ekeko ka Merari oudo tie iye jo me ot ka Makali kede Musi. 34Cuo dedede kame oko wandiko i diere gin cako ki atin awobi me duwe acel oko bedo tutumia kanyape kede tol are (6,200). 35Suriel wot ka Abikail en kame oudo poore telo jo ka Merari nogi; gin oudo kipoore gero kimere gi i bad tetu malo me Eema. 36Gin bin oko mino gi tic me gwoko atekai me Eema, ariin mege, ipirin mege, agangeta kede kadudupo gi. Tice dedede amakere kede gi nogi oudo tie i cing gin. 37Doko da oudo koketo i cing gi kop amako ipirin, agangeta, loce kede aunoi me gero diakal aluko Eema.

38Jo kame oudo poore gero kimere gi i nyim Eema i bad tetu kide oudo obedo Musa, Aaron kede awobe ka Aaron. Tice dedede kame oudo kotimo i Kabedo Kacil pi jo me Isirael oudo tie i cing gin. Dano ace apat kame oudo cako donyo timo tice amako gin nogo oudo kopoore neke. 39Cuo dedede kikom Jolebi kame Musa kede Aaron oko wandiko cako kibut idwe awobe me duwe acel ingei Rwot ciko negi pi timo kamanono, oko bedo tutumia ot are kiwie are (22,000).

Jolebi Olunyo Wang Idwe Awobe Kao

40Rwot oko waco ne Musa be, “Wandiko nying cuo kobedo kao cako kibut idwe me duwe acel dok malo, di iko maro gi. 41Gin kibedo mega, do ango abino gamo Jolebi kawang gi pi bedo mega amaka, doko da abino gamo leini ka Jolebi kawang leini kobedo nywal me kao kikom leini me jo me Isirael.” 42Aso Musa oko wandiko nying cuo kobedo kao dedede me Isirael bala kame Rwot oudo ociko ne, 43di wel gi cako kibut idwe me duwe acel oko tuno tutumia ot are kiwie are kede tol are kede ot kanyaare kiwie adek (22,273).

44Di Rwot oko waco ne Musa be, 45“Nan wek Jolebi luny wang cuo kao me Isirael di gin kiko doko mega, di leini gi da ko lunyo wang leini kobedo nywal kao me jo me Isirael. Ango en Rwot. 46Bala kame wel me cuo me Isirael kobedo nywal kao kalamo wel me Jolebi kede tol are kede ot kanyaare kiwie adek (273), kopoore lako magonogo alaka kibuta. 47Buli acelacel kikom gi kobino culo siliba akaya kany, di koporo kede gipim me Kabedo Kacil, 48di iko bino mino Aaron kede awobe mege sente nogo.” 49Aso Musa oko coko sente kame kolako kede jo kobedo nywal kao me Isirael tol are kede ot kanyaare kiwie adek nogo, jo koudo orem likame Jolebi olunyo kawang gi, 50di wel me sente nono oko tuno siliba akaya tutumia acel kede tol adek kede ot kanyape kiwie kany (1,365). 51Di Musa oko mino sente nono but Aaron kede awobe mege bala kame oudo Rwot ociko ne kede.

Baibuli I Leb Kumam

© 2013 Bible Society of Uganda

More Info | Version Index