Formulaire de recherche

Matthew 15

kayās kiskinohamākēwin

(Mark 7.1-13)

1Phariseewak mīna kā‑kiskinohamākēcik wiyasiwēwin Jerusalemihk ohci kī‑pē-nātēwak Jesusa ēkwa kakwēcimēwak, 2“tānēhki kikiskinohamawākanak kā‑pīkonahkik otisīhcikēwiniyiw kēhtē-aya? namwāc kwayask kāsīcihcēwak wī‑mīcisotwāwi.”

3Jesus ōmisi itēw ēsa, “tānēhki kā‑pīkonamēk kā‑kī-itasiwātikoyahk kisē-manitow, ēkwa mēskoc kitisīhcikēwiniwāwa ē‑pimitisahamēk?

4“ayisk kisē-manitow kī‑itasiwēw, ‘kistēyim kohtāwiy mīna kikāwiy’ ēkwa ‘awiyak kitimahāci ohtāwiya ahpō okāwiya, ēwako ayisiyiniw kita-nipahiht.’ 5māka kiyawāw kititwānāwāw, ‘kīspin awiyak wīhtamawēw ohtāwiya ahpō okāwiya, “anima kita-kī-ohci-wīcihitakok, nikī-kihci-itwān kisē-manitow kita-miyak,” ’ 6ēkosi namōya katāc kita-kistēyimāt onīkihikwa. namōya kīkway kititakihtēnāwāw otitwēwin kisē-manitow, wiya ē‑pimitisahamēk kitisīhcikēwiniwāwa. 7tōtamohkāsoskak! kī‑tāpwēw Isaiah ēkospī kī‑kiskiwēhamākowāw,

8‘ōki ayisiyiniwak, kisē-manitow itwēw, tāpiskōc ē‑kistēyimicik kā‑isi-pīkiskwēcik,

māka otēhiwāhk wāhyaw ohci niya.

9konita nimawimostākwak

wiya ayisiyiniwa nayēstaw

kā‑kī-osīhtāyit namōya niya anihi wiyasiwēwina

kā‑nīkānastācik kā‑kiskinohamākēcik!’ ”

anima kā‑wīpācihikot ayisiyiniw pīhcāyihk

(Mark 7.14-23)

10ēkosi tēpwātēw ayisiyiniwa ē‑itāt, “pēhtamok mīna nisitohtamok: 11namōya anima kīkway kā‑saskamot ayisiyiniw otōnihk ka‑wīpācihikow, māka anihi otōnihk kā‑wayawīmakaniyiki kā‑wīpācihikot.”

12ēkota okiskinohamawākana pē‑nātik Jesus ē‑itikot, “kikiskēyihtēn cī ē‑kisīmacik Phariseewak ōma kā‑itwēyan?”

13Jesus ōmisi itēw ēsa, “kahkiyaw kistikāna ēkāya ē‑ohci-kistikēt nohtāwiy kihci-kīsikohk kā‑ayāt kita-manipitimāwa. 14kiyām wiya ēwakonik. okiskinohtahiwēwak aniki ēkāya ē‑wāpicik ēkwa ē‑kiskinohtahācik ēkāya kā‑wāpiyit. kā‑kiskinohtahāt awiyak ēkāya ē‑wāpit kotaka, kita-pahkisinwak wātihkānihk.”

15naskwēwasimēw ēsa Peter ē‑itāt, “mahti nisitohtamōhinān anima kā‑itwēyan.”

16ēkwa ēsa Jesus itēw, “kēyāpic cī ēkāya ē‑nisitohtamēk? 17ēkāya cī ē‑wāpahtamēk ayisiyiniw kīkway kā‑mīcit watāhk ati-ispayiyiw ēkwa piyisk ati-wayawīmakaniyiw? 18anima kā‑isi-pīkiskwēt ayisiyiniw, otēhihk anima ē‑ohcipayiniyik, ēkosi ēwako anima kā‑wīpācihikot ayisiyiniw.

19ayisk otēhihk kā‑ohcipayiniyiki maci-māmitonēyihcikēwina, nipahtākēwin, nōtiskwēwēwin mīna kahkiyaw pisikwātisiwin, kimotiwin, kiyāskiwin, mīna maci-āyimōmiwēwin. 20ēwakoni ōhi kīkwaya kā‑wīpācihikot ayisiyiniw. māka ta‑mīcisot awiyak ēkāya ē‑kāsīcihcēt, namōya anima ēwako kā‑wīpācihikot ayisiyiniw.”

Canaani-iskwēw otāpwēwakēyihtamowin

(Mark 7.24-30)

21Jesus kī‑sipwēhtēw ēkota ohci ēkwa kī‑itohtēw askīhk cīki Tyre ēkwa Sidon. 22ēkotē kētahtawē pēyak Canaani-iskwēw pē‑tēpwātēw ē‑itāt ēsa, “kitimākinawin kā‑tipēyihcikēyan, okosisa David, nitānis kakwātakihtāw ē‑pīhciyawēskākot maci-ahcāhkwa.”

23namwāc māka Jesus naskwēwasimēw. ēkwa okiskinohamawākana pē‑sīhkimikiw, “kipimi-tēpwātikonaw. mahti īkatētisa.”

24ōmisi itēw Jesus, “nipē-isitisahokawin wiyawāw piko ohci Israelīwiyiniwak, ēwakonik tāpiskōc kā‑wanisihkik māyatihkwak.”

25māka pē‑ocihcihkwanapīstāk anihi iskwēwa ēkwa itik, “kā‑tipēyihcikēyan, wīcihin!”

26Jesus naskwēwasimēw ē‑itāt, “namōya miywāsin kita-maskamihcik awāsisak omīciwiniwāw ēkwa atimwa kita-isi-wēpinamāmiht kita-mīciyit.”

27“tāpwē, kā‑tipēyihcikēyan, ahpō atimwak mīciwak otōkimāmiwāwa iskwascikana kā‑isi-wēpinamākocik,” itik ēsa.

28ēkwa Jesus ōmisi itēw, “iskwēw, tāpwē sōhkan kitāpwēwakēyihtamowin/kitāpowakēyihtamowin! kita-tōcikātēw kā‑isi-nitawēyihtaman.” ēkosi ēsa, tāpwē miywāyāyiwa sēmāk otānisa.

Jesus iyinīhkahēw mihcēt ayisiyiniwa

29ēkwa ēkota ohci Jesus kī‑itohtēw sisonē Galilee sākahikanihk. ati-tahkohtaciwēw ēsa waciy, ēkwa ēkota ay‑apiw. 30ē‑mā-mihcētiyit ayisiyiniwa ēkota pē‑nātik ē‑pēsiwāyit anihi kā‑māskikātēyit, ēkāya kā‑wāpiyit, kā‑māskisiyit, ēkāya kā‑kī-pīkiskwēyit ēkwa kotaka piko isi ē‑itāspinēyit, ēkwa ēkota Jesus kā‑apit cīki ositihk kī‑pē-takohtahēyiwa, kahkiyaw ōhi Jesus kī‑iyinīhkahēw. 31ēkwa ayisiyiniwak ēsa mitoni māmaskātamwak ē‑pīkiskwēyit ōhi ēkāya kā‑kī-pīkiskwēyit oskac, kā‑māskisiyit ē‑miywāyāyit, kā‑māskikātēyit kwayask ē‑pimohtēyit, ēkwa ēkāya kā‑wāpiyit ē‑wāpiyit; ēkosi ēsa mamihcimēwak Israel ohci omanitōmiwāwa.

Jesus asamēw nēwāw kihci-mitātahtomitanaw nāpēwa mīna kotaka

(Mark 8.1-10)

32Jesus ēsa natomēw okiskinohamawākana ēkwa ōmisi itēw, “nikitimākinawāwak ōki ayisiyiniwak ayisk nisto kīsikāw ē‑wīcēwicik ēkwa namōya kīkway mīciwin ē‑ayācik. namōya ninōhtē-sipwēhtisahwāwak ē‑nōhtēhkatēcik, wiya ati-kīwētwāwi kita-nōhtēsinwak.”

33ēkwa okiskinohamawākana itik, “tānitē māka kita-ohtināyahk pahkwēsikan ōta pakwāci-ayihk kita-asamāyahkok iyikohk ōki kā‑mihcēticik?”

34ēkwa ēsa Jesus itēw, “tānitahto pahkwēsikanak ē‑ayāwāyēkok?”

“tēpakohp ēkwa ātiht kinosēsisak,” itik ēsa.

35ēkosi Jesus ēsa ayisiyiniwa wīhtamawēw kita-apiyit, 36ēkwa kī‑otinēw anihi tēpakohp pahkwēsikana ēkwa kinosēsisa. ē‑kī-nanāskomāt kisē-manitowa kī‑pahkwēnēw mīna kī‑miyēw okiskinohamawākana kita-asamāyit ayisiyiniwa. 37ēkwa kahkiyaw kī‑mīcisowak isko iyikohk ē‑kīspocik; ēkwa okiskinohamawākanak kī‑māwasakonamwak kā‑ayiwākipayiki tēpakohp misi-wīkopīwata ē‑sākaskinahtācik. 38aniki kā‑mīcisocik māmawi nēwāw kihci-mitātahtomitanaw nāpēwak, ēkāya ē‑akimihcik iskwēwak mīna awāsisak.

39ispīhk ē‑kī-kīwētisahwāt ayisiyiniwa Jesus kī‑pōsiw ōsihk ē‑isicimēt Magadan askīhk.

Plains Cree Scripture Portions

Plains Cree Scripture Portions © 2014 Canadian Bible Society

More Info | Version Index