Formulaire de recherche

EXODUS 18

Jethro Nih Mosi A Veh

1Midian bâwlpu, Jethro, Mosi pu nih chun Pathian nih Aigupta thawk hen a suakpi na liauah Mosi leh Israel mi zapi rangah thil a ti mi chu a theih. 2Churuangah Mosi sinah a kal le, Mosi nupi Zipporah a kaltâk mi chu a fapa panih Gersom leh 3Eliezer chu a put na. (Mosi nih, “Ramdang minung mi ram ah um mi ka si,” churuangah a fapa pakhat min ah Gersom+ a sak. 4“Ka pa Pathian nih chun Aigupta lalchem nih hawng ka thah awt mi ruang hawng ka suah,” a ti le, a fa dang min ah Eliezer+ a sak.) 5Jethro leh Mosi nupi chu a fapa panih hen Mosi umnâk ramkaro tlâng thenhlimh ah an va kal. 6Kan hawng asi ti hen Mosi sinah thu a thanh. 7Churawhchun Mosi chu a tawng ding hen a suak le, a pu mâika ah a kûn le, a châwchawk. An nung leh dam thâwng anna deih rawh chun Mosi puanin ah an lût rawh. 8Mosi nih Israel tla ruangsuah na ding hen LALPA nih Aigupta lalchem leh a mi le tla lakah thil a ti mi zawzawng Jethro a simh ver. Lampi ah mi zapi tla nih harsatnâk an tawng mi lakah LALPA nih ruang a suah na mi thu khawm a simh. 9Jethro nih chubang zawzawng chu a theih le, thungâi â lâwm. 10“LALPA, Aigupta lalchem leh a mi tla lakah mi ruang an suah natu chu sawr hen um seh! A mi tla sal ah tâng mi suah natu LALPA chu sawr hen um seh! 11Tu chun LALPA chu pathian zawzawng tla ngâk hen a rokual dauh ti ka theih rawh. Aigupta mi tla nih Israel tla zauhnawmh hen an nehsawh na mi lakah hi hâwi hen thil a ti ruangah,” a ti. 12Jethro nih duah hep ding mi bâwlnâk leh Pathian sinah bâwlnâk dang ap ding mi chu a hawng put le; Aron leh Israel ruitu tla chu bâwlnâk thenhlimh sa ei ding hen a sinah an va kal bâk.

Lâirêltu Ding Mi Tla Ruatnâk

(Deut 1.9-18)

13A thâituan ah chun Mosi nih zapi lakah thunawk a rêl le, zîngtê thawk hen nî tlâk hen â nawk. 14Jethro nih Mosi thil ti ding mi zawzawng chu a muh le, “Nangmah nih mi zapi rangah thil zawzawng na ti ver mi hi zei zia? Zeirangah nangmah lâwng hen hi zawng thil hi na ti, zîngtê thawk hen nî tlâk hen mi zapi nih nangmah karo thu an deih?” a ti.

15Mosi nih, “Mi tla nih Pathian duhzia theih ding an duh ruangah hi bang tla hi ka ti ding rêng asi. 16Mi panih thu anna êl chun ka sinah an hawng kal le, a zei mi dik ti thlûk ding hen Pathian thupêk leh dân tla ka simh na,” ti hen a sâng.

17Churawhchun Jethro nih, “Na ti dân a dik lo. 18Nang leh hi mi zapi minung tla rangah dîtnâk asi lai. Hi hi nangmah lâwng ti ding hen chun a tam tuktarâi. 19Tuah ti dân ṭha ka nan simh, Pathian na sinah um seh. Mi zapi tla Pathian mâika ah na ap mi anna êlnâk a sinah na va tlunh mi chu a dik asi. 20Pathian thupêk tla chu na sîntir na hen um ding dân tla leh an thilti ding khawm na simhfiang na lai. 21Sikhawmsele, thil dang lakah chun a tlâk dauh mi minung thîm le, zapi minung ruitu ding ruat na le, sângkhat ruitu, zâ ruitu, sâwmngâ ruitu, parâ ruitu tla ding mi ruat na. Pathian ṭih mi, mi zumhkâi, nawhnâk lâk lo mi an si ding asi. 22Chu tla chu zapi minung lâirêl piak kumzatu ding hen ruat na. Thu har tuktarâi chu na sinah hawng tlunh sele, thu tênâu lam chu anmah nih an rêl kho. Chu hâwi hen na ritphurh an sâwng lai le, na rangah a zâng dauh lai. 23Pathian thupêk hâwi hen na ti chun nangmah khawm na dî lai lo le, zapi minung tla khawm an thunawk ruat hen an lâwi kho lai,” a ti.

24Mosi nih Jethro simh dân a zûl le, 25Israel mi lakah mi zumhkâi tla a thîm na rawh. Sâng hotu tla, zâ hotu tla, sâwmngâ hotu tla, parâ hotu tla a ruat na. 26Chubang tla chu mi zapi lâirêltu ah bir tak hen an um le, Mosi sinah thu har dauh an tlunh le, thu tênâu lam chu anmah nih an rêl.

27Chun, Mosi nih Jethro rangah dam tak hen a ti le, Jethro khawm a in leiah a tlung rawh.

Bawm Common Language Bible Version

This translation, was published by the Bangladesh Bible Society in 2004 ©BBS 2004

More Info | Version Index