Formulaire de recherche

2 Jon 1

1Yek nebewelimu ipak pasuh God ananin balan uli yeneku balan asudak pas. Yenekasumagu nyak almatok+ douk God ananatalih-enyu nyape ananinyaluli nyanu nyakich batowich. Yek adul ulkum manubu manohwepu. Ali douk wak yek otuwe ulkum munohwepu e, wak. Chanatimaguk chadukemu aduligeinyi balan chagipechen uli douk chopuk ulkwip panohwepu. 2Umu moneken, enyudak adulin atinyi balan douk nyape apak ali eke nyunubu nyupe eheh nyumneh. 3Sapos apak miyagwleh adulin atinyi balan ali ulkwip punosuh kipahechimu, Aninu God nunu Jisas Krais apakinu Aninu ananinu Nuganinu eke hunelekapu hugakomapu meyoh ali hunekapu apaluh hlulu kalbu.

Apak Imas Mugipech Enyudak Pasin Umu Ulkwip Punosuh Kipahechimu

4Yek yanubu yenehilawamu agundak yemnek umu enech nyakich batowich chagipech aduligeinyi balan umu. Chagipechen kobi Aninu naklipapu dodogowinyi balan umu mugipechen umu. 5Ali nameitu yek yakli iwemu enen balan ali iklipenyu namudak nyak nyanubu yopinyali almatok. Apak manatimaguk atin ati imas munubu ulkwip punosuh umu. Enyudak lo nameitu yaklipenyumen uli, enyen douk wak iklipenyu enen nupolein lo e, wak. Enyen douk seiwak wata susubati malawen madukemen uli. 6Bawagas umu agundak apak ulkwip punosuh kipahechimu douk namudak. Apak mupemu mugipech God ananin lo. Enyudak lo douk watak susubati ipak panatimaguk pemneken uli. Enyen douk nyakli namudak. Ipak imas punubu ulkwip punosuh kipahechi.

Apak Munubu Musuh Krais Ananin Balan Dadag

7Wolobaimi almam halahe hanak wolobaigunmu apudak atap uli, amam douk hakli hunek lohumapu. Amam douk hapemu hakli Jisas Krais anan douk wo nutoglu adulinyi elpen e, wak. Amudakmali almam douk hapemu henek loh uli. Ali amam douk Krais ananim birua. 8Ipak punek yologimu kedeke kobi pulau yopichi echudak douk apenek moulamu kwali eke pulawech uli. Wakuli punubu pulawech piyatech umu douk eke kalbu. 9Meichi elpech douk wo chunubu chusuh Krais ananin balan dadag ali chatukemenyuk chagipech kipainyili, echech douk wo God nupenyich e, wak. Wakuli echebuk douk chanubu chasuh enyudak yopinyi balan dadag uli, nameitu Aninu nanu Nuganinu douk hapenyich. 10Meichi elpech chunakumagu ipak ali wo chusuh enyudak balan uli e, ipak kobi pulawech chunepu pupe ipakig wilag o pukli pukech loguh punehilau-mech, wak. 11Meichi elpech douk chukli chukech loguh ali chunehilaumu echudakmali elpech uli, echech douk eke chunech atin balan. Ali eke chunech chunechle-pamu yowenyi echech cheneken uli.

Nyagikuk Uli Balan

12Yek wolobainyi balan douk yakli inyemumepagu asudak pas uli. Wakuli yakli wak umu inyemagu pas meyoh, wak. Yakli inaku itulipu ali mupe atugun miyagwleh meyoh umu douk eke munubu munehilau mulikuk.

13Nyakik owawik+ douk God anatalihok umu kwupe ananik nugawik uli, okwokwich batowich douk chenemenyagu gude nyak.

God Ananin Balan

© 2013, Wycliffe Bible Translators, Inc. All rights reserved. More Info | Version Index